Душанбе, 06 октябр, – АИ «Корвон Иттилоот».  Аз 13 то 15 ноябр дар пойтахти Тоҷикистон Намоишгоҳи байналмилалии универсалии “Тоҷикистон-2025” баргузор мешавад, ки яке аз муҳимтарин рӯйдодҳои иқтисодиву тиҷоратии сол хоҳад буд. Дар ин бора Палатаи савдо ва саноати Ҷумҳурии Тоҷикистон хабар дод.

Намоишгоҳ дар “Экспосентри Душанбе” доир гардида, соҳибкорон, сармоягузорон ва ширкатҳои инноватсионӣ аз кишварҳои мухталифро гирди ҳам меорад.

Ҳадафи асосии он — муаррифии дастовардҳои иқтисоди миллӣ, табодули таҷриба, инчунин баррасии роҳҳои нави ҳамкорӣ дар бахшҳои гуногун — аз саноат ва кишоварзӣ то технологияҳои иттилоотӣ ва энергетикаи сабз мебошад.

Бино ба гуфтаи ташкилдиҳандагон, “Тоҷикистон-2025” заминаи мусоид барои пайдо кардани шарикони нав, густариши ҳамкориҳои байналмилалӣ ва амалӣ намудани лоиҳаҳои муштараки сармоягузорӣ фароҳам меорад.

Интизор меравад, ки дар намоишгоҳ намояндагони даҳҳо кишвар иштирок намоянд, ки ин ба он симои байналмилалӣ мебахшад.
Намоишгоҳ на танҳо воситаи намояндагии имкониятҳои содиротии Тоҷикистон, балки рамзи сиёсати боз ва мусоид барои сармоягузорӣ низ хоҳад буд.

Баргузории намоишгоҳи “Тоҷикистон-2025” ҷузъи муҳими дипломатияи иқтисодии кишвар ва пешбурди брендҳои миллӣ дар бозорҳои байналмилалӣ маҳсуб мешавад.

Ба андешаи коршиносон, чунин чорабиниҳо ба тақвияти имиҷи мусбати Тоҷикистон дар арсаи ҷаҳонӣ ва ҷалби бештари сармояи хориҷӣ мусоидат мекунанд.

Акс: аз манбаъҳои боз