Дар Китобхонаи миллии Тоҷикистон имрӯз, 4-уми сентябр бахшида ба Рӯзи китоб Рӯзи дарҳои кушод баргузор шуда истодааст, ки он то 5 сентябр идома хоҳад ёфт.
Дар ин рӯз роҳбаладон ва кормандони китобхона меҳмононро бо осорхонаи китобҳои нодир, осорхонаи даврони истиқлолият, расми таърихии «Аз давру замон, аз аср ба аср», толорҳои хониши Китобхонаи миллӣ шинос мекунанд.
Мақсад аз баргузории Рӯзи дарҳои кушод ҷалби таваҷҷӯҳи ҷомеа ба китоб, мутолиаи китоб ва китобхона мебошад. Баргузории чунин рӯзҳо дар Китобхонаи миллӣ дар ҳама ҷашнҳои миллӣ ба як анъанаи нек табдил ёфта, меҳмонон ва сокинони кишвар имкони шиносоӣ бо толорҳои хониши китобхонаро доранд.
Дар ин рӯз сокинони шаҳри Душанбе, омӯзгорону хонандагони мактабҳои миёнаву олӣ ва меҳмонони хориҷӣ метавонанд аз Китобхонаи миллии Тоҷикистон дидан кунанд.
Ба гуфтаи сардори шуъбаи системаи иттилоотии автоматии Муассисаи давлатии «Китобхонаи миллии Тоҷикистон» Ёқуб Бобохонов, имрӯз тамоми хизматрасониҳо дар Китобхонаи миллӣ, аз ҷумла бақайдгирии хонандагон, ҷобаҷогузорӣ, нигоҳдорӣ, ҷустуҷӯ, фармоиш додани адабиёт, тамошои китоб дар формати электронӣ дар доираи системаҳои автоматикунонидашудаи системаи иттилоотии китобхонавӣ амалӣ карда мешаванд.
«Дар маҷмӯъ дар фонди Китобхонаи миллии электронии Тоҷикистон беш аз 350 ҳазор мавод мавҷуд аст. Дар баробари ин руйхати адабиётҳо руз то руз зиёд мешаванд. Китобҳо бо истифода аз мошини нусхабардории муосир рақамӣ карда мешаванд, ки ҳама намудҳои ҳуҷҷатҳои электрониро ба назар мегиранд: PDF, DJWU, FB2, Text, Microsoft word ва ғайра. Ҳамаи хоҳишмандон метавонанд бо сабти ном дар сомонаи nlt.tj аз адабиёт ройгон истифода баранд», – гуфт ҳамсӯҳбат ва қайд кард, ки китобхона дастрасии қулай ба адабиёт, ҷустуҷӯи ягона, феҳристи электронӣ ва миқдори зиёди захираҳоро фароҳам меорад.
Аз ҷумла, аз адабиёти электронии Китобхонаи миллии Тоҷикистон дар хориҷи кишвар ҳам ҳамватанон ва олимони хориҷӣ фаъолона истифода мекунанд.
«Оид ба интихоб ва истифодаи китобҳои электронӣ бояд гуфт, ки ба онҳо донишҷӯён, аспирантҳо ва асосан хонандагони мактабҳои миёна таваҷҷӯҳ доранд. Ин омор ба тахлилҳо асос ёфтаанд. Китобхонаи электронӣ ба зиёд шудани шавқу рағбат ба мутолиаи адабиёт, ки дар ҳама ҷо дастрас аст, мусоидат мекунад. Аммо масъалаи истифодаи китобҳои электронӣ миёни мутахассисон ва коршиносон, ҳатто корбарони ин навъи иттилоот андешаҳои мухталифро ба вуҷуд меорад”, – шарҳ дод сардори раёсат.
Қобили зикр аст, ки дар ин рӯзҳо кормандони Китобхонаи миллӣ меҳмононро дар толорҳои хониш ҳамроҳӣ карда, ба онҳо тарзи ҷустуҷӯи адабиёт ва дархости китобро нишон медиҳанд.
АКС аз манбаъҳои боз