Душанбе, 20 декабр, 2025 – АИ «Корвон Иттилоот».  Дар доираи сафари расмии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Ҷопон ва иштироки ӯ дар нахустин Саммити сарони давлатҳо дар формати «Муколамаи Осиёи Марказӣ + Ҷопон» дар шаҳри Токио як қатор чорабиниҳои ҳамзамон баргузор гардиданд, ки ба таҳкими шарикии Тоҷикистону Ҷопон дар самтҳои стратегии ҳамкорӣ равона шудаанд. Яке аз рӯйдодҳои муҳими ин барнома платформаи махсуси тиҷоратӣ «Tajik — Japan Digital Business Connect» буд, ки ба рушди иқтисоди рақамӣ ва ҳамкориҳои инноватсионӣ бахшида шуд.

Тибқи иттилои Агентии инноватсия ва технологияҳои рақамӣ, чорабинии ҳамроҳ 18 декабр дар Токио баргузор шуда, ҳадафи он муаррифии иқтидор ва имкониятҳои рақобатпазири бахши рақамии Ҷумҳурии Тоҷикистон барои шарикони ҷопонӣ ва доираҳои байналмилалии тиҷоратӣ буд.

Баргузории «Tajik — Japan Digital Business Connect» идомаи мантиқии муколамаи сиёсӣ дар сатҳи олӣ гардид, ки дар доираи Саммити «Осиёи Марказӣ + Ҷопон» сурат гирифт. Дар шароити дигаргунсозиҳои ҷаҳонии рақамӣ маҳз технологияҳо ба воситаи амалӣ табдил меёбанд, ки тавофуқҳои сиёсиро ба лоиҳаҳои мушаххаси сармоягузорӣ ва тиҷоратӣ пайванд медиҳанд.

Чорабинӣ бо ташаббуси Агентии инноватсия ва технологияҳои рақамӣ дар ҳамкорӣ бо Хадамоти алоқаи назди Ҳукумати Ҷумҳурии Тоҷикистон ташкил карда шуд. Директори Агентӣ Хуршед Мирзо бо маърӯзаи муфассал оид ба имкониятҳо, афзалиятҳо ва дурнамои рушди соҳаҳои инноватсия ва технологияҳои рақамӣ дар Тоҷикистон баромад намуд.

Дар кори платформа резидентҳои IT Park Dushanbe ва ширкатҳои пешсафи технологии Ҷумҳурии Тоҷикистон иштирок намуданд. Дар ҷараёни мулоқотҳои мустақими B2B намояндагони бахши рақамии кишвар бо ширкатҳои ҷопонӣ ва доираҳои соҳибкорӣ музокироти самарабахш анҷом доданд.

Зимни мулоқот таҷрибаҳои пешрафта, шаклҳои эҳтимолии ҳамкорӣ, татбиқи лоиҳаҳои муштарак ва муаррифии маҳсулот ва хизматрасониҳои рақамӣ, ки аллакай барои бозорҳои байналмилалӣ омодаанд, баррасӣ гардиданд. 

Масъалаҳои рушди экосистемаи стартапӣ, ҷалби сармоягузорӣ, содироти хизматрасониҳои рақамӣ, ҷорӣ намудани технологияҳои муосир ва густариши робитаҳои мустақими тиҷоратӣ мавқеи меҳварӣ доштанд.

Коршиносон бар ин назаранд, ки чунин чорабиниҳо самти стратегии Тоҷикистонро дар роҳи рушди босуръати иқтисоди рақамӣ ва инноватсия инъикос мекунанд. Солҳои охир кишвар пайваста заминаҳои институтсионалӣ ва ҳуқуқиро барои рушди бахши IT ташаккул дода, ҳамзамон ба ҳамгироӣ бо занҷираҳои глобалии технологӣ таваҷҷуҳ зоҳир менамояд.

Баргузории «Tajik — Japan Digital Business Connect» ҳамчун қадами муҳим дар муаррифии Ҷумҳурии Тоҷикистон ҳамчун шарики боэътимод ва ояндадор дар соҳаи технологияҳои рақамӣ ва саҳми назаррас дар татбиқи ҳадафҳои стратегии кишвар дар самти рушди иқтисоди рақамӣ ва ҳамкориҳои байналмилалӣ баҳои баланд гирифт.

АКС: Агентии инноватсия ва технологияҳои рақамӣ