Душанбе, 04 октябр, – АИ «Корвон Иттилоот». Дар Кумитаи забон ва истилоҳоти назди Ҳукумати Ҷумҳурии Тоҷикистон 3 октябр конфронси ҷумҳуриявии илмӣ-амалӣ таҳти унвони «Забон дар масири Истиқлолият: масъалаҳо ва дурнамо» бахшида ба Рӯзи забони давлатӣ баргузор гардид.

Ташкилкунандагони чорабинӣ Кумитаи забон ва истилоҳот ва Академияи миллии илмҳои Тоҷикистон буданд. Конфронс муҳаққиқон ва донишмандони соҳаи забоншиносиро гирд овард, ки дар он масъалаҳои калидии нақши забони тоҷикӣ дар ҷомеаи муосир ва равандҳои давлатсозӣ баррасӣ шуданд.

Аз ҷумла, мавзӯъҳои зерин матраҳ гардиданд:

• саҳми Президенти кишвар дар таҳкими ҷойгоҳи забони тоҷикӣ дар дохил ва берун аз кишвар;
• нақши истиқлолият дар рушду ҳифзи забони давлатӣ;
• аҳамияти забон дар ташаккули худшиносии миллӣ ва ҳамбастагии ҷомеа.

Раиси Кумитаи забон ва истилоҳот Олимҷон Муҳаммадҷонзода зимни суханронии худ таъкид намуд, ки забон пояи ахлоқ ва давлатдорист ва фарҳанг, ахлоқ ва ҷаҳонбинии миллат дар он таҷассум меёбад. Ӯ зикр кард: «Забони тоҷикӣ моҳияти худшиносии миллӣ ва рӯҳияи моро инъикос мекунад. Маҳз тавассути забон мо метавонем хотираи таърихии миллатро ҳифз намоем ва робитаи худро бо мероси ҳазорсолаи маънавии худ эҳсос кунем».

Дар конфронс ҳамчунин суханони Президенти Ҷумҳурии Тоҷикистон муҳтарам Эмомалӣ Раҳмон ёдоварӣ гардид: «Дар раванди ташаккул ва рушди худ забони тоҷикӣ роҳи пурмашаққатро тай кардааст, аз озмоишҳои сахти таърихӣ гузаштааст, вале онҳоро бо ифтихор паси сар намуд. Имрӯз, дар давраи истиқлолият ва давлатсозии миллӣ, он ҳамчун яке аз сутунҳои асосии давлатдорӣ ва омили ваҳдату ҳамбастагии ҷомеа вазифаи худро бо сарбаландӣ иҷро мекунад».

Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон», ки 5 октябри соли 2009 аз ҷониби Президенти кишвар муҳтарам Эмомалӣ Раҳмон ба имзо расид, марҳалаи муҳим дар таҳкими сиёсати забонӣ гардид. Аз ҳамон замон ин рӯз ҳамасола ҳамчун Рӯзи забони давлатӣ ҷашн гирифта мешавад, ки нишонаи эҳтирому арҷгузорӣ ба арзишҳои таърихиву фарҳангии миллати тоҷик аст.

Рӯзи забони давлатӣ дар Тоҷикистон танҳо санаи фарҳангӣ нест, балки хотиррасон месозад, ки забон омили стратегии худшиносии миллӣ ва давлатдорӣ мебошад. Дастгирӣ ва рушди забони тоҷикӣ дар сатҳи давлатӣ пояи ҳифзи мероси маънавӣ ва таҳкими ваҳдати ҷомеаро фароҳам меорад.

АКС: аз манбаъҳои кушода