Душанбе, 09 декабр, 2025г. – АИ «Корвон Иттилоот». Дар пойтахт чорабинии тантанавӣ ба муносибати 30-солагии таъсиси баргузор гардид. Дар он Вазири корҳои дохилӣ Рамазон Раҳимзода, роҳбарони раёсату шуъбаҳо, собиқадорон, аъзои оилаҳои кормандони ҳалокшуда ва меҳмонони ифтихорӣ иштирок намуданд.

Отряди милисияи махсуси таъиноти ВКД (ОМОН) 5 декабри соли 1995 дар шароити ноустувории иҷтимоӣ ва авҷгирии гурӯҳҳои ҷиноятии муташаккил таъсис ёфт. Дар он рӯзҳо кишвар ба воҳиди зудҳаракат, касбӣ ва дорои омодагии баланд ниёз дошт.

«Аз аввалин рӯзҳо ҷавонмардони ҷасур ва рӯҳан мустақим ба сафи Отряди милисияи махсуси таъиноти ВКД пайвастанд. Бо талошу ҷасорати онҳо воҳид ба сутуни боэътимоди давлат табдил ёфт», — таъкид кард вазир Рамазон Раҳимзода.

Ба гуфтаи Рамазон Раҳимзода, Пешвои миллат муҳтарам Эмомалӣ Раҳмон ҳамеша ҷасорат ва садоқати кормандони Отряди милисияи махсуси таъиноти ВКД -ро қадр мекунанд. Сарвари давлат хуб медонад, ки кормандони ин воҳид дар солҳои душвор борҳои гаронро ба дӯш гирифта, дар амалиётҳои басо хатарнок ширкат варзиданд.

Дар тӯли 30 сол онҳо дар амалиётҳои безараргардонии гурӯҳҳои ҷиноятӣ, таъмини амнияти ҷамъиятӣ ва мубориза бо терроризм фаъолона ширкат карданд.

Ба ифтихори ин санаи таърихӣ 246 нафар аз кормандони воҳидҳои махсус бо медалҳо, нишонҳои сарисинагӣ, Ифтихорномаҳо, Сипосномаҳо, дипломҳои ВКД, мукофотҳои пулӣ ва тӯҳфаҳои хотиравӣ сарфароз шуданд. Ин қадрдонӣ ифодаи эҳтиром ба хизмати солҳо ва фидокории ҳар як корманд мебошад.

Чорабинӣ бо машқҳои тактикӣ анҷом ёфт. Кормандон амалиёти безараргардонии гурӯҳи террористӣ, озодсозии гаравгонҳо, безарар кардани дастгоҳи таркандаи худсохт ва боздошти ҷинояткорони мусаллаҳро дар шароити биноҳои истиқоматӣ ва нақлиёт намоиш доданд.

Ин тамринҳо сатҳи баланди омодагии ҷангӣ ва ҳамоҳангии амалиётии воҳидро нишон доданд. Тавре вазир қайд кард, ояндаи Отряди милисияи махсуси таъиноти ВКД  ба такмил ва муосирсозии таҷҳизот, баланд бардоштани сатҳи омодагии касбӣ ва густариши ҳамкорӣ вобаста мебошад. Воҳид ҳамоно яке аз сохторҳои асосии ҳифзи амнияти кишвар боқӣ мемонад.

Акс: Вазорати корҳои дохилии Ҷумҳурии Тоҷикистон