Душанбе, 14 январ, – АИ «Корвон Иттилоот». Дар пойтахти Тоҷикистон 13 январ марҳилаи муҳими ташаккули фазои хотираи миллӣ ва худшиносии таърихӣ оғоз гардид. Раиси Маҷлиси милли Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо як гурӯҳ бостоншиносон, таърихшиносон, фарҳангшиносон, инчунин намояндагони илм ва адабиёт вохӯрӣ баргузор намуд, ки ба масъалаи таъсиси Маҷмааи эҳёи хотираи таърихӣ ва таҳкими ҳувияти миллӣ бахшида шуд.

Мақомоти иҷроияи ҳокимияти давлатии шаҳри Душанбе хабар медиҳад, мулоқот дорои муҳтавои амиқи илмӣ ва консептуалӣ буд. Иштирокчиён на танҳо ҷанбаҳои меъморӣ ва ташкилии Маҷмааи ояндаро, балки аҳамияти фалсафӣ, фарҳангӣ ва тарбиявии онро баррасӣ намуданд. Иқдом аз ҷониби ҷомеаи илмӣ ва эҷодӣ бо ҷонибдории якдилона пазируфта шуда, пешниҳодҳо ва андешаҳои арзишманд иброз гардиданд.

Иқдоми таърихӣ-фарҳангие, ки аз ҷониби муҳтарам Рустами Эмомалӣ пешниҳод шудааст, ба таҳкими худшиносии миллӣ, худогоҳӣ, ҳифзи ҳувияти миллӣ, инчунин арҷгузорӣ ба таърихи пурифтихор ва мероси ғании маънавию фарҳангии халқи тоҷик равона гардидааст. Дар шароити ҷаҳони муосир ва таҳдидҳои гуногун чунин ташаббусҳо ҳамчун такягоҳи устувории маънавии миллат аҳамияти хос пайдо мекунанд.

Бояд таъкид намуд, ки ин ташаббус идомаи мантиқии сиёсати бунёди давлатдории миллӣ ва сиёсати хирадмандона ва дурбинонаи Пешвои миллат мебошад. Он ба ҳифзи пояҳои маънавӣ, таърихӣ ва тамаддунии ҷомеаи тоҷик ва таҳкими робитаи наслҳо нигаронида шудааст.

Маҷмааи оянда на танҳо як иншооти меъморӣ, балки фазои рамзии маънавие хоҳад шуд, ки дар он гузашта, имрӯз ва фардои халқи тоҷик ба ҳам мепайванданд. Он макони арҷгузории шахсиятҳое мегардад, ки дар тӯли таърих дар роҳи озодӣ, истиқлолият, давлатдорӣ ва рушди фарҳанги миллӣ саҳми бузург гузоштаанд.

Ин макон тадриҷан ба як зиёратгоҳи умумихалқӣ табдил ёфта, фазои андеша, намунаи ахлоқӣ, худшиносӣ ва тарбияи ватандӯстии насли ҷавон хоҳад гардид. Ташаббус паёми возеҳе ба ҷомеа дорад: халқи тоҷик решаҳои худро мешиносад, аз таърихи худ ифтихор мекунад ва бо такя ба худогоҳии миллӣ роҳи ояндаи созандаро интихоб менамояд.

Ин иқдом дар заминаи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ», ки 16 декабр ироа гардид, амалӣ мешавад. Он замон Сарвари давлат ба Ҳукумати мамлакат ва Мақомоти иҷроияи ҳокимияти давлатии шаҳри Душанбе супориш доданд, ки барои таъсиси Конун — Маркази тамаддуни ориёӣ дар пойтахт ва ҳамзамон Маркази байналмилалии Наврӯз чораҳои зарурӣ андешанд.

Президенти Ҷумҳурии Тоҷикистон таъкид намуданд, ки мероси таърихию фарҳангӣ «шиносномаи» халқи куҳанбунёди тоҷик мебошад. Пешвои миллат зикр карданд, ки ниёгони барҷастаи мо — ориёиҳо — ба ҷомеаи ҷаҳонӣ забон ва фарҳанг, илм ва санъат, ойину суннатҳои инсондӯстона, аз ҷумла Наврӯз, инчунин анъанаҳои пешқадами давлатдориро ҳамчун тамаддун ва фарҳанги ҷовидона ба мерос гузоштаанд.

«Мо вазифадорем, ки на танҳо аз ин мероси нодир ифтихор кунем, балки онро аз худ намуда, омӯзем, идома диҳем ва ҳамчун ганҷи бебаҳои маънавӣ ба наслҳои оянда супорем», — таъкид намуданд Президенти кишвар.

Дар ин замина, сиёсати фарҳангии пойтахт низ аҳамияти хоса дорад. Бо ташаббуси муҳтарам Рустами Эмомалӣ ҷашни байналмилалии Наврӯз ҳамасола дар шаҳри Душанбе дар сатҳи баланд ва бошукӯҳ таҷлил мегардад. Дар доираи он роҳпаймоиҳои идона, барномаҳои театрикунонидашуда, форумҳои илмӣ-амалӣ, ҷашнвораҳои байналмилалӣ, инчунин мусобиқаҳо ва турниру бозиҳои миллии варзишӣ баргузор мешаванд, ки ба таҳкими ҳувияти фарҳангӣ ва нуфузи байналмилалии кишвар мусоидат менамоянд.

Таъсиси Маҷмааи эҳёи хотираи таърихӣ идомаи табиии ҳамин сиёсат буда, ба унвони рамзи муносибати огоҳона ба гузашта ҳамчун пояи устувори оянда хизмат хоҳад кард.

Акс: Мақомоти иҷроияи ҳокимияти давлатии шаҳри Душанбе