Душанбе, 25 сентябр, – АИ «Корвон Иттилоот». Тими миллии футзали Тоҷикистон, бо вуҷуди мағлубият дар бозии ҳалкунанда бо Ҷопон, тавонист ба марҳилаи ниҳоии Ҷоми Осиё-2026 роҳ ёбад.

Мусобиқаи интихобии гурӯҳи «С» аз 20 то 24 сентябр дар Қасри теннис ва варзишҳои обии Душанбе баргузор шуд. Дар бозии ниҳоӣ бо Ҷопон тақрибан 2850 тамошобин ҳузур доштанд, ки фазои ҳақиқатан хонагиро барои шогирдони Пайрав Воҳидов фароҳам сохтанд.

Мукобила бо қаҳрамонҳои чоркаратаи Осиё бо ҳисоби 1:3 анҷом ёфт, аммо тими Тоҷикистон бозии шоиста нишон дод. Танҳо голи дастаи моро Самандар Ризомов ба ҳадаф расонд.

Пеш аз вохӯрӣ бо Ҷопон тими миллии Тоҷикистон ду ғалабаи дурахшон ба даст оварда буд:

бар Макао бо ҳисоби 10:2,

бар Камбоҷа бо ҳисоби 7:1.

Дар натиҷа, Тоҷикистон бо 6 имтиёз мақоми дувумро дар гурӯҳ ишғол кард ва ба ҳайати ҳафт тими беҳтарин дохил шуд, ки аз дувумин ҷойҳо ба марҳилаи финалӣ роҳ ёфтанд.

Дар марҳилаи интихобӣ 31 даста ширкат дошт. Барандагони гурӯҳҳо — Австралия, Таиланд, Ҷопон, Ветнам, Қирғизистон, Эрон ва Афғонистон — мустақиман ба финал роҳ ёфтанд. Ғайр аз Тоҷикистон, аз ҳисоби «беҳтарин ҷойҳои дувум» роҳхатро Кувайт, Кореяи Ҷанубӣ, Узбекистон, Лубнон, Малайзия ва Мянмар ба даст оварданд.

Ин ҳайат ваъда медиҳад, ки мусобиқа пуршиддат хоҳад буд. Фаворитҳо анъанавӣ — Эрон, Ҷопон ва Таиланд, аммо коршиносон нерӯ гирифтани дастаҳои Осиёи Марказиро низ таъкид мекунанд.

Марҳилаи ниҳоии Ҷоми Осиё-2026 аз 27 январ то 7 феврал дар Индонезия баргузор мешавад. Дар он 16 даста ба чор гурӯҳ тақсим хоҳанд шуд.

Барои Тоҷикистон вазифаи аввал — баромадан аз гурӯҳ, ва ҳадафи асосӣ — собит намудани ҷойгоҳ дар қатори дастаҳои пурқудрати қора мебошад.

Нишондиҳандаи мусбат — ҳуҷумҳои пурқувват: 18 гол дар се бозӣ. Вале дар хатти дифоъ камбудиҳо мавҷуданд — шаш голи хӯрда метавонад дар вохӯриҳо бо дастаҳои пурқувват нақши ҳалкунанда бозад.

Маълубият аз Ҷопон танҳо як лаҳза буд, на ҳукм. Тими миллии Тоҷикистон сазоворона ба финали Ҷоми Осиё роҳ ёфт ва саҳифаи наверо дар таърихи футзали миллӣ менависад. Пешорӯи даста — Индонезия ва санҷиши бузурги сатҳи футзали тоҷик аст.

АКС: Федератсияи футболи Тоҷикистон