Душанбе, 07 октябр, – АИ «Корвон Иттилоот». Соли 2025 Ҷумҳурии Тоҷикистон раёсати Садорати Давлатҳои Мустақилро ба уҳда дорад ва бо ташаббусҳои созанда, ташкилоти намунавӣ ва сиёсати фаъол дар самти ҳамгироӣ, амният ва рушди устувор фарқ мекунад. Дар ин бора Дабири кулли ИДМ Сергей Лебедев дар мусоҳиба бо АМИТ «Ховар» изҳори назар намуд.
Ба гуфтаи ӯ, Тоҷикистон бори сеюм (пас аз солҳои 2011 ва 2018) ин масъулияти баландро ба уҳда гирифта, беш аз 110 чорабинии дар доираи Консепсияи раёсат пешбинишударо сари вақт ва муташаккилона амалӣ намудааст. Дар миёни онҳо — ҷаласаҳои Шӯрои сарони ҳукуматҳо, вазирони корҳои хориҷӣ, Шӯрои иқтисодӣ, Маҷлиси байнипарлумонӣ, инчунин Форуми XVIII аҳли илм ва фарҳанг ва Фестивали дӯстии ҷавонони ИДМ мебошанд.
Аз самтҳои асосии раёсат — тасдиқи Нақшаи марҳалаи дуюми амалӣ намудани Стратегияи рушди иқтисодии ИДМ барои солҳои 2026–2030 мебошад.
Ҳамчунин як қатор ҳуҷҷатҳои нав қабул гардиданд, аз ҷумла:
- Созишнома оид ба ҳамкорӣ дар рушди мошинсозии вазнин,
- Консепсияи рушди саноати сабук,
- Стратегияи рақамисозии долонҳои нақлиётии ИДМ (пешниҳоди Тоҷикистон),
- Стратегияи рушди илмӣ-технологии СНГ (2026–2035),
- Стратегияи ҳамкорӣ дар иқтисоди рақамӣ.
Ба гуфтаи Лебедев, ин ташаббусҳо заминаи боэътимод барои рушди саноат, сармоягузорӣ ва навоварӣ фароҳам меоранд.
Яке аз дастовардҳои муҳим — қабули қатъномаи Маҷмаи Умумии СММ «Ҳамкорӣ байни СММ ва ИДМ» бо ибтикори Тоҷикистон мебошад. Ҳуҷҷат нақши ИДМ-ро ҳамчун шарики боэътимоди СММ дар таҳкими сулҳ ва рушди устувор тасдиқ намуд.
Дар Саммити дарпешистодаи Душанбе тасдиқи як қатор барномаҳо пешбинӣ шудааст:
- оид ба таҳкими амнияти сарҳадӣ (2026–2030),
- мубориза бо терроризм ва ифротгароӣ (2026–2028),
- консепсияи ҳамкории ҳарбӣ то соли 2030,
- эъломияи ҳамкорӣ дар соҳаи амнияти энергетикии минтақавӣ.
Тоҷикистон инчунин ташаббуси ташкили формати «ИДМ+»-ро барои густариши ҳамкорӣ бо СҲШ ва ИАЭС пешниҳод намудааст.
Дар давраи раёсати Тоҷикистон Бозиҳои III кишварҳои ИДМ, як қатор форумҳои башардӯстона баргузор шуданд ва ба шаҳри Душанбе унвони рамзии «Шаҳри шӯҳрати меҳнатӣ» дода шуд. Ҳамчунин Стратегияи рушди илмӣ-технологӣ то соли 2035 тасдиқ гардид.
Дар бахши нақлиёт Стратегияи рақамисозии долонҳои нақлиётии бисёрҳадаф, ки аз ҷониби Тоҷикистон пешниҳод шудааст, қабул гардид. Ҳадафи он – соддагардонии расмиёти гумрукӣ ва рушди логистика мебошад.
Тоҷикистон дар соҳаи энергетика нақши пешсафона дорад — пас аз танаффуси 15-сола кори ҳамзамони низомҳои энергетикии Осиёи Марказӣ барқарор гардид ва Стратегияи нави рушди маҷмааи сӯзишворӣ ва энергетикаи ИДМ таҳия мешавад.
Бо ташаббуси Президенти Ҷумҳурии Тоҷикистон муҳтарам Эмомалӣ Раҳмон соли 2025 ҳамчун Соли байналмилалии ҳифзи пиряхҳо эълон шудааст. Конфронси байналмилалии сатҳи баланд дар Душанбе таваҷҷуҳи ҷомеаи ҷаҳониро ба масъалаҳои об ва иқлим ҷалб намуд.
«Раёсати Тоҷикистон бар принсипҳои самаранокӣ, пайдарҳамӣ ва ошкоро асос ёфтааст, — таъкид намуд Сергей Лебедев. — Ҷумҳурии Тоҷикистон масъулиятҳои худро бо садоқат иҷро карда, саҳми назаррас дар таҳкими иқтидори ҳамгироии ИДМ мегузорад».
Акс: Хадамоти матбуоти Кумитаи иҷроияи ИДМ