Душанбе, 20 сентябр, – АИ «Корвон Иттилоот».  18 сентябр дар Кумитаи рушди туризми назди Ҳукумати Ҷумҳурии Тоҷикистон вохӯрии намояндагони ширкатҳои туристии Тоҷикистон ва шаҳри Қазони Федератсияи Русия баргузор шуд, ки дар ҷараёни он созишномаҳои нави ҳамкорӣ имзо шуданд.

Дар музокирот асосан васеъ кардани муносибатҳои дуҷониба дар соҳаи туризм, омӯзиши таҷрибаи Қазон ва ҷалби сармоя барои рушди соҳаи туристӣ дар Тоҷикистон баррасӣ гардид.

Ҷонибҳо имкониятҳои истифодаи беҳтарин таҷрибаи Федератсияи Русия, махсусан дар баланд бардоштани сифати хизматрасонӣ ва ташкили мубодилаи туристӣ байни ду кишварро муҳокима карданд.

Намояндагони ҳар ду ҷониб ба ҳамкории пурсамар ва дарозмуддат таваҷҷуҳ карданд ва таъкид намуданд, ки туризм воситаи муҳим барои тақвияти дӯстӣ байни халқҳо ва баланд бардоштани сатҳи иқтисодӣ тавассути рушди соҳаи туристӣ мебошад.

АКС: Кумитаи рушди туризми назди Ҳукумати Ҷумҳурии Тоҷикистон