Душанбе, 25 декабр, 2025 – АИ «Корвон Иттилоот». Тоҷикистон ва Қирғизистон имконияти ифтитоҳи консулгариҳои генералиро дар шаҳрҳои Хуҷанд ва Ош баррасӣ мекунанд. Ин масъала зимни мулоқоти кории директори Департаменти консулгарии Вазорати корҳои хориҷии Ҷумҳурии Қирғизистон Сейтек Жумакадыр уулу бо Сафири Фавқулода ва Мухтори Ҷумҳурии Тоҷикистон дар Қирғизистон Назирмад Ализода матраҳ гардид.

Дар ҷараёни музокирот ҷонибҳо масъалаҳои мубрами ҳамкории дуҷониба дар соҳаи консулгариро баррасӣ намуда, ба ҳамкории фаврӣ дар самти ҳифзи ҳуқуқ ва манфиатҳои қонунии шаҳрвандони ҳар ду кишвар аҳамияти аввалиндараҷа доданд. Ҳамзамон, густариши имкониятҳои расонидани хизматрасониҳои консулӣ низ мавриди таваҷҷуҳи махсус қарор гирифт.

Иштирокчиёни вохӯрӣ инчунин масъалаҳои баланд бардоштани самаранокии фаъолияти муассисаҳои дипломатӣ, соддагардонии расмиёти консулӣ ва фароҳам овардани шароити иловагӣ барои роҳатии шаҳрвандони Тоҷикистону Қирғизистонро муҳокима карданд.

Айни ҳол дар шаҳри Душанбе Сафорати Ҷумҳурии Қирғизистон фаъолият мекунад, ки намояндагии дипломатӣ ва хизматрасонии консулӣ ба шаҳрвандони Қирғизистонро дар қаламрави Тоҷикистон таъмин менамояд. Ифтитоҳи консулгариҳои генералӣ дар Хуҷанд ва Ош имкон медиҳад, ки хизматрасониҳои консулӣ ба аҳолии минтақаҳои наздимарзӣ наздиктар гарданд, зеро дар ин минтақаҳо робитаҳои инсонӣ, иқтисодӣ ва гуманитарӣ хеле фаъол мебошанд.

Коршиносон бар он назаранд, ки татбиқи ин ташаббус на танҳо аҳамияти амалӣ, балки маънои рамзӣ низ дорад. Густариши ҳузури консулӣ далели талоши ҷонибҳо барои таҳкими муносибатҳои Тоҷикистону Қирғизистон, афзоиши эътимод ва ташаккули механизмҳои устувори ҳамкорӣ мебошад.

Интизор меравад, ки ифтитоҳи муассисаҳои нави дипломатӣ ба таҳкими робитаҳои гуманитарӣ ва тиҷоратӣ, осон гардидани ҳаракати шаҳрвандон ва рушди ҳамкории фарогир байни ду давлат мусоидат хоҳад кард.

АКС: шабакаи телевизионии «Мир»