Душанбе, 01 ноябр, – АИ «Корвон Иттилоот». 29 октябр дар шаҳри Душанбе мулоқоти раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон Фарҳод Раҳимӣ бо Сафири Фавқулода ва Мухтори Ҷопон дар Ҷумҳурии Тоҷикистон хонум Фурута Кейко баргузор гардид. Ҷонибҳо масоили рушди ҳамкории дуҷониба дар соҳаи таҳсилоти ибтидоӣ ва миёнаи касбӣ ва имкониятҳои нави тақвияти робитаҳои таълимӣ ва техникиро баррасӣ намуданд.

Зимни суҳбат масъалаҳои муҳими тайёр кардани кадрҳои соҳибкасб, омӯзиши забони ҷопонӣ, мубодилаи таҷриба ва дастгирии техникию методӣ мавриди муҳокима қарор гирифтанд.

Фарҳод Раҳимӣ зикр кард, ки солҳои охир бо дастгирии Ҳукумати Ҷумҳурии Тоҷикистон ва шарикони рушд инфрасохтори муассисаҳои таҳсилоти ибтидоӣ ва миёнаи касбӣ дар саросари кишвар ба таври назаррас рушд ёфтааст, ва ин заминаи мусоид барои беҳтарсозии сифати таълим ва омода кардани мутахассисони ҷавобгӯ ба талаботи бозори меҳнат мебошад.

Дар ҷараёни мулоқот таъкид гардид, ки барномаҳои ҳамкории Тоҷикистон ва Ҷопон, аз ҷумла дар доираи Агентии Ҷопон оид ба ҳамкории байналмилалӣ (JICA), имконият медиҳанд, ки мутахассисони ҷавони тоҷик дар курсҳои омӯзишӣ ва таҷрибаомӯзиҳои амалӣ дар самтҳои муҳандисӣ, энергетика, менеҷмент ва технологияҳои иттилоотӣ ширкат варзанд.

Ин таҷрибаҳо барои такмили донишу малакаҳои мутахассисони тоҷик ва баланд бардоштани сатҳи рақобатпазирии онҳо дар бозори меҳнат мусоидат менамоянд.

Ҷонибҳо ҳамчунин масъалаи омӯзиши забони ҷопонӣ дар муассисаҳои зерсохтори Кумита ва роҳҳои тақвияти ҳамкорӣ бо муассисаҳои таҳсилоти касбии Ҷопон-ро баррасӣ карданд.

Таъкид гардид, ки омӯзиши забон на танҳо омили тавсеаи робитаҳои фарҳангиву таълимӣ, балки василаи муҳими шиносоии ҷавонон бо арзишҳои меҳнатӣ ва технологияи муосири Ҷопон мебошад.

Дар анҷоми мулоқот ҷонибҳо аз сатҳи кунунии ҳамкории байниҳукуматӣ дар соҳаи таҳсилоти касбӣ изҳори қаноатмандӣ намуда, итминон доданд, ки робитаҳои байни Кумита ва Сафорати Ҷопон минбаъд низ густариш хоҳанд ёфт.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон