Душанбе, 12 январ, – АИ «Корвон Иттилоот». Намояндагии Созмони Байналмилалии Муҳоҷират (МОМ) дар Тоҷикистон шаҳрвандонро ҳушдор додааст, ки ҳангоми ҷустуҷӯи кор дар Британияи Кабир ба ҳама гуна эълонҳо ва даъватҳо бепоён бовар накунанд. Сабаби ин ҳушдор афзоиши паҳншавии иттилои бардурӯғ тавассути шабакаҳои иҷтимоӣ ва паёмрасонҳо мебошад.

Тавре дар изҳороти МОМ зикр мешавад, пешниҳодҳои корӣ дар Британияи Кабир, ки тавассути WhatsApp ва Telegram ирсол мегарданд, қалбакӣ мебошанд, зеро «корфармоёни воқеӣ ҳеҷ гоҳ барои муоширати расмӣ аз паёмрасонҳо истифода намекунанд». Ба гуфтаи мутахассисон, чунин даъватҳо аксаран бахше аз нақшаҳои қаллобонаанд, ки шаҳрвандонро ба дом меандозанд.

МОМ ба шаҳрвандони Тоҷикистон тавсия медиҳад, ки барои кори мавсимӣ дар Британияи Кабир фақат тавассути сомонаҳои расмии ширкатҳо сабтином шаванд. Ҳамзамон таъкид мегардад, ки барои шаҳрвандони Тоҷикистон дар ин кишвар, ба ҷуз аз Барномаи коргарони мавсимӣ, дигар роҳҳои қонунии шуғл вуҷуд надоранд.

«Ба реклама дар шабакаҳои иҷтимоӣ бовар накунед — аксари чунин эълонҳо метавонанд бардурӯғ бошанд. Ҳар гуна маълумотро ҳатман санҷед», — омадааст дар паёми созмон. Ба андешаи коршиносон, чунин эҳтиёткорӣ хатари фиреб хӯрдан ва талафоти молиро коҳиш медиҳад.

Дар МОМ хотиррасон мекунанд, ки қаблан рӯйхати ширкатҳое пешниҳод шуда буд, ки иҷозатномаи расмӣ барои ҷалби коргарони мавсимӣ доранд. Сабтином дар сомонаҳои расмии онҳо кафолати асосии амнияти ҳуқуқӣ ва муҳофизати манфиатҳои муҳоҷирон мебошад.

Рӯйхати корфармоёни дорои иҷозатнома:

Agri-HR – agri-hr.com

Concordia – concordia.org.uk

Fruitfuljobs – fruitfuljobs.com

HOPS Labour Solutions – hopslaboursolutions.com

Pro-Force – pro-force.co.uk

Маълумоти бештар ва машваратро метавон бо рақами 900 800 800 дарёфт кард.

Дар анҷом МОМ таъкид мекунад: муроҷиат танҳо ба манбаъҳои расмӣ ва ҳушёрӣ ҳангоми интихоби ҷойи кор беҳтарин роҳи муҳофизат аз қаллобон ва ҳифзи ҳуқуқи муҳоҷирони меҳнатӣ мебошад.

Акс: https://economist.kg/