Душанбе, 13 ноябр, – АИ «Корвон Иттилоот». 13–14 ноябр дар шаҳри Душанбе иҷлосияи тирамоҳии Ассамблеяи байнипарламентии давлатҳои кишварҳои Иттиҳоди Давлатҳои Мустақил баргузор мегардад. Ҳайати Шӯрои Федератсияи Русия таҳти роҳбарии раиси палатаи болоии парлумон Валентина Матвиенко, ки ҳамзамон раиси Шӯрои Ассамблеяи байнипарламентии давлатҳои кишварҳои ИДМ мебошад, дар кори он ширкат меварзад.

Дар доираи барномаи сафари худ, хонум Матвиенко дар ҷаласаи Шӯрои Ассамблея, иҷлосияи 59-уми умумӣ, инчунин дар як қатор мулоқотҳои дуҷониба бо роҳбарони парлумонҳои кишварҳои аъзо иштирок мекунад.

Дар рӯзномаи иҷлосия интихоби раиси нави Шӯрои Ассамблеяи байнипарламентии давлатҳои кишварҳои ИДМ, тасдиқи роҳбарони комиссияҳои доимӣ ва муҳокимаи нақшаи дурнамои қонунгузории намунавӣ барои солҳои 2026–2028 пешбинӣ шудааст. Дар ҷараёни кори иҷлосия масоили таҳкими ҳамкории байнипарлумонӣ, ҳамоҳангсозии ташаббусҳои қонунгузорӣ ва тақвияти заминаи ҳуқуқии ҳамкорӣ дар самтҳои иқтисодӣ, иҷтимоӣ ва рақамӣ мавриди баррасӣ қарор мегиранд.

Ба иттилои маркази матбуоти Шӯрои Федератсияи Русия, ба ҳайати русӣ инчунин муовини раиси палата Николай Журавлёв, раиси Кумитаи илм, маориф ва фарҳанг Лилия Гумерова ва як қатор роҳбарони кумитаҳои калидӣ шомил мебошанд.

Баргузории иҷлосияи тирамоҳии Ассамблеяи байнипарламентии давлатҳои кишварҳои ИДМ дар Душанбе аҳамияти рамзӣ дорад, зеро Тоҷикистон давраи раёсатдории худро дар Иттиҳод ҷамъбаст мекунад.

Ин нишасти сатҳи баланд на танҳо бозтоби сиёсати фаъол ва нақши афзояндаи Тоҷикистон дар фазои ҳамгироии пасошӯравӣ мебошад, балки барои Русия низ имкони таҳкими мавқеи худ ҳамчун шарики стратегии давлатҳои минтақа аст.

 Маҳз тавассути чунин платформаҳои байнипарлумонӣ ҳамгироии иқтисодӣ, суботи сиёсӣ ва рушди мутақобилан судманд таъмин мегардад.

АКС: Тедеграмм канали Рустами Эмомали (ака аз байгони)