Душанбе, 05 октябр, – АИ «Корвон Иттилоот». Аз 1 октябри соли 2025 дар Ҷумҳурии Тоҷикистон даъвати тирамоҳии шаҳрвандон ба сафи Қувваҳои Мусаллаҳи кишвар оғоз гардид. Дар рӯзи аввали даъват иҷрои нақшаи ҷумҳуриявӣ 55 фоизро ташкил дод, хабар медиҳад Вазорати мудофиаи Ҷумҳурии Тоҷикистон.

Анъана аст, ки рӯзи аввали даъват бо чорабиниҳои тантанавӣ таҷлил мешавад. Дар «Рӯзи даъватшаванда» садҳо ҷавонписарон ба комиссариатҳои ҳарбии маҳалли зисти худ ҳозир шуда, омодагии худро барои хизмат ва иҷрои бурҷи шаҳрвандӣ дар назди Ватан нишон доданд.

Дар нахустрӯзи даъват Вилояти Мухтори Кӯҳистони Бадахшон нақшаи пешбинигардидаро 101 фоиз иҷро намуд, инчунин шаҳрҳо ва ноҳияҳои Норак, Вахш, Балҷувон (вил. Хатлон) ва Сангвор аз иҷрои нақша гузориш доданд.

Даъват дар асоси Фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбӣ, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998–2007 ба хизмати ҳарбӣ» ташкил ва ба роҳ монда шудааст.

Дар ҳар вилоят ва шаҳру ноҳияҳо комиссияҳои даъватӣ аз ҳисоби намояндагони мақомоти иҷроияи маҳаллӣ ва мақомоти давлатӣ таъсис ёфтаанд, ки давоми моҳҳои октябр ва ноябр вазифадоранд даъват ва фиристодани шаҳрвандон ба хизмати ҳатмии ҳарбиро ба роҳ монанд.

Ёдовар мешавем, ки дар Тоҷикистон ҳамасола ду марҳила — апрел–май ва октябр–ноябр — мардони 18–27-сола ба хизмати ҳатмии ҳарбӣ даъват мешаванд. Ҳамзамон бо даъват, сарбозони муҳлати хизматашон ба итмом расидаро марҳила ба марҳила аз сафи Артиши миллӣ, қисмҳои қудратӣ ва мақомоти ҳифзи ҳуқуқ ба эҳтиёт рухсат медиҳанд.

Аз ин рӯ, даъвати тирамоҳӣ вазифаи муҳими давлатӣ буда, барои пурра кардани Қувваҳои Мусаллаҳи кишвар ва тайёр кардани ҷавонон ба ҳифзи Ватан хизмат мекунад.

АКС: Вазорати мудофиаи Ҷумҳурии Тоҷикистон