Душанбе, 24 декабр, – АИ «Корвон Иттилоот». Дар Тоҷикистон курсҳои омӯзиши забони ҷопонӣ, ки ба муҳоҷирати бехатар ва бо ҷойи кор таъмин шудан дар Ҷопон равона шудаанд, бомуваффақият ба анҷом расиданд. Барнома аз моҳи июл оғоз гардида, аз ҷониби Созмони байналмилалии муҳоҷират (МОМ) дар ҳамкорӣ бо Маркази забон ва фарҳанги ҷопонии «КОКОРО» ва бо дастгирии Агентии Швейтсария оид ба рушд ва ҳамкорӣ (SDC) татбиқ шуд.

Ин курсҳо на танҳо омӯзиши забон, балки марҳилаи муҳими омодагӣ барои фаъолияти меҳнатӣ дар хориҷи кишвар ба шумор мерафтанд. Иштирокчиён донишҳои ибтидоии забони ҷопониро барои муоширати касбӣ аз худ намуда, ҳамзамон бо фарҳанг, анъанаҳо ва хусусиятҳои зиндагӣ дар Ҷопон шинос шуданд, ки барои мутобиқшавии муваффақ ва коҳиши хатарҳои муҳоҷиратӣ аҳамияти калон доранд.

Маросими тантанавии супоридани сертификатҳо дар Маркази забон ва фарҳанги ҷопонии «КОКОРО» баргузор гардид. Дар чорабинӣ намояндагони Агентии ҳамкории байналмилалии Ҷопон (JICA) иштирок намуда, таъкид карданд, ки донистани забон ва фаҳмиши муҳити фарҳангӣ омили асосии мутобиқшавӣ ва бо кор таъмин шудан дар хориҷ мебошад.

Иштирокчиён қайд намуданд, ки омӯзиш ба онҳо эътимоди бештар бахшида, барои фаъолияти минбаъда дар Ҷопон омодагии беҳтар фароҳам овард. Барнома ба расидан ба сатҳи дониши забони ҷопонӣ на камтар аз N4 равона шуда буд — меъёре, ки барои кор дар Ҷопон зарур аст. Ҳамаи шунавандагон курсро бомуваффақият хатм намуда, сертификатҳои расмӣ гирифтанд.

Татбиқи чунин барномаҳо нишон медиҳад, ки МОМ ба масъалаҳои муҳоҷирати меҳнатӣ бо равиши ҳамаҷониба муносибат мекунад, ки дар он бехатарӣ, огоҳӣ ва ҳифзи иҷтимоии муҳоҷирон дар маркази таваҷҷуҳ қарор дорад.

АКС: IOM Tajikistan