Bundan roppa-rosa 106 yil oldin, 1918-yil 11-noyabrda, Kompen o‘rmonida Birinchi jahon urushiga chek qo‘ygan sulh bitimi imzolandi. Muzokaralar marshal Ferdinand Foshning temir yo‘l vagonida o‘tkazildi. Unda nemis delegatsiyasiga general-mayor Detlef fon Vinterfeldt boshchilik qildi, Antanta tomonidan esa marshal Fosh va Britaniya admirali Rosslin Uimiss ishtirok etdi.

O‘t ochishni to‘xtatish to‘g‘risidagi kelishuv ertalab soat 5:10 da imzolanib, ramziy vaqt — 11-noyabr (11-oy) soat 11 va 11 daqiqada kuchga kirdi. Sulh shartlariga ko‘ra, Germaniya amalda taslim bo‘ldi. U bosib olingan hududlardan qo‘shinlarni olib chiqish, harbiy asirlarni ozod qilish, ittifoqchilarga katta miqdordagi qurol-yarog‘ zaxiralarini, jumladan 10 ming lokomotiv, artilleriya va pulemyotlarni topshirish, shuningdek, harbiy flotni taslim qilish majburiyatini oldi.

Sulhning bu qat’iy shartlari o‘nlab mamlakatlarni qamrab olgan va jahon tarixining yo‘nalishini o‘zgartirib yuborgan to‘rt yillik mojaroga yakun yasadi. Antanta bunga javoban hech qanday majburiyat olmadi. Bu kelajakda Yevropada keskinlikning kuchayishiga va natijada Ikkinchi jahon urushining kelib chiqishiga sabab bo‘lgan omillardan biri edi.