Markaziy bankda AQSH Savdo vazirligining Tijorat huquqini rivojlantirishga ko‘maklashish dasturi (CLDP) vakillari bilan uchrashuv o‘tkazildi. Uchrashuvda Markaziy bank mutaxassislari “CERT-CBU” kiberxavfsizlik markazi faoliyati to‘g‘risida ma’lumot berdilar.

Tadbir davomida bank va to‘lov tizimlarini himoya qilish uchun dasturiy va texnik yechimlarning joriy etilishi, shuningdek, bank kartalari bilan bog‘liq firibgarliklarning oldini olishga yordam beradigan antifrod tizimlarining tatbiq etilishi hamda mobil ilovalar xavfsizligini kuchaytirish choralari haqida batafsil ma’lumot taqdim etildi.

Muzokaralar jarayonida O‘zbekistonda yangi to‘lov tizimlarini joriy etish va ularning samarali qo‘llanilishini qo‘llab-quvvatlovchi huquqiy bazani takomillashtirish masalalariga ham e’tibor qaratildi.

Uchrashuv yakunida tomonlar onlayn formatda tajriba almashishni tashkil etishga kelishib oldilar. Ushbu tadbirlar kiberxavfsizlik, kadrlar tayyorlash va malakasini oshirish, shuningdek, moliyaviy texnologiyalar va xavfsiz to‘lov tizimlarini rivojlantirish masalalariga bag‘ishlanadi.