1-8-noyabr kunlari Minsk shahrida o‘tkazilgan «Лiстапад» XXX xalqaro kinofestivali doirasida O‘zbek kinosi kuni bo‘lib o‘tdi. Bu tadbir Belarus va O‘zbekistonning madaniyat idoralari vakillari hamda mehmonlarning e’tiborini tortdi. Tadbirda Belarus madaniyat vazirining birinchi o‘rinbosari Valeriy Gromada, O‘zbekiston Kinematografiya agentligi direktori o‘rinbosari Alisher Xo‘jayev boshchiligidagi O‘zbekiston delegatsiyasi, shuningdek rasmiy shaxslar va jurnalistlar qatnashdi.

Ochilish marosimida ishtirokchilar Belarus va O‘zbekiston o‘rtasidagi madaniy hamkorlik, xususan kinematografiya sohasida jadal rivojlanayotganini ta’kidlashdi. 2018-yildan buyon ikki mamlakat kinematografchilari ko‘plab qo‘shma loyihalarni amalga oshirib, umumiy tarixiy va madaniy qadriyatlarni aks ettiruvchi badiiy va hujjatli filmlar yaratishdi.

O‘zbekiston kinofestivalda rejissyorlar Ulug‘bek Yo‘ldoshev va Eljon Abbosovning “Shuhrat Abbosov yirik rejada” hujjatli filmini, shuningdek rejissyor Akbar Bekturdiyevning sovet mergani Ziba G‘aniyeva taqdiriga asoslangan “O‘zbegim” harbiy dramasini taqdim etdi. Ulug‘ Vatan urushi yillarida ayollarning fidokorligini ko‘rsatuvchi “O‘zbegim” filmi 2022-yilda Belarusda suratga olingan.

“O‘zbekfilm” kinokonserni direktori Bahodir Odilov O‘zbekistonning har yili festivalda ishtirok etishi muhimligini ta’kidlab, o‘zbekistonlik kinoijodkorlar belaruslik hamkasblari bilan hamkorlikni qadrlaydcagonliklari va muntazam ravishda suratga olish uchun Belarusga tashrif buyurishlarini aytdi. So‘nggi yillarda Belarusda “Ilhaq”, “Xotira”, “Muhabbat bahori” kabi filmlar suratga olindi.