Rossiyada 2025-yilda saratonga qarshi birinchi vaksinaning klinik sinovlari boshlanishi rejalashtirilmoqda. Hozirda rossiyalik mutaxassislar bunday vaksinalarning ikki turini bir vaqtning o‘zida yaratish ustida ishlamoqda. Ulardan birining dastlabki tadqiqotlari 2024-yil oxiri — 2025-yil boshlarida boshlanadi.

Ishlab chiqilayotgan vaksinaning o‘ziga xos jihati uning shaxsiy yondashuvidir. Har bir onkologik bemor uchun o‘smasining xususiyatlariga moslashtirilgan alohida vaksina tayyorlanadi. Ishlab chiqish jarayonida bemordan o‘sma hujayralari namunalari olinib, ular asosida “o‘sma pasporti” deb ataladigan noyob oqsil profili yoki bu o‘smani boshqalardan farqlaydigan neoantigenlar profili yaratiladi.

Vaksina yaratilishi Rossiya Sog‘liqni saqlash vazirligining “NMITS radiologiya” Federal davlat byudjeti muassasasi tomonidan ishlab chiqilgan Ariadna dasturiga asoslanadi. Ariadna bemorning o‘smasini yo‘q qilishga aniq yo‘naltirilgan mRNK-vaksinasini loyihalash uchun o‘sma pasporti ma’lumotlaridan foydalanadi. Loyihalash yakunlangach, vaksina sintezlanadi va bemorga saratonning ma’lum bir turiga qarshi kurashish uchun uning immunitet tizimini faollashtirish maqsadida yuboriladi.