21-23 noyabr kunlari Toshkentdagi “Central Asian Expo Uzbekistan” (CAEx) ko‘rgazmalar majmuasida “Ipak yo‘lida turizm” 29-Toshkent xalqaro turizm yarmarkasi bo‘lib o‘tadi. Tadbirda milliy va xalqaro sayyohlik kompaniyalari, mehmonxonalar, aviakompaniyalar, turizm bilan shug‘ullanuvchi tashkilot va uyushmalar, shuningdek, transport kompaniyalari va onlayn bronlash tizimlari vakillari ishtirok etadi.

Yarmarka dasturidan anjumanlar, ishbilarmonlik uchrashuvlari, turistik xizmatlar va hunarmandchilik ko‘rgazmalari, O‘zbekiston hududlarining turistik imkoniyatlari taqdimotlari, gastronomik festival va boshqa tadbirlar o‘rin olgan.

TXTY turli mamlakatlarning madaniy va tarixiy merosini almashish, muloqot qilish va targ‘ib qilish uchun xalqaro platformaga, shuningdek, kompaniyalar o‘zlarining turistik mahsulotlarini namoyish etishlari mumkin bo‘lgan joyga aylandi. Bu nafaqat O‘zbekiston, balki butun Markaziy Osiyo mintaqasining turizm sohasi uchun asosiy voqea hisoblanadi.

Toshkent yarmarkasi 1995-yildan buyon Birlashgan Millatlar Tashkilotining Butunjahon turizm tashkiloti ko‘magida o‘tkazib kelinmoqda. Unda mamlakatlar o‘z turistik imkoniyatlarini namoyish etadi, ekspertlar esa turizmni rivojlantirishning dolzarb masalalarini muhokama qiladi. O‘tgan yili yarmarka uch kun davomida 30 ta davlatdan 300 dan ortiq vakil va 13 ming nafar tashrif buyuruvchidan iborat rekord darajadagi ishtirokchilarni jamladi.