Toshkentda Yevropa iqtisodiyoti kunlari tadbirlari boshlandi. Bu 300 dan ortiq ishtirokchi, jumladan biznes, davlat va xalqaro tashkilotlar vakillarini jamlagan ilk forum hisoblanadi.

Delegatlarga Yevropa komissiyasi raisi Ursula fon der Lyayen videomurojaatda so‘zladi. U O‘zbekistonning savdo va investitsiya aloqalari markazi sifatidagi ahamiyatini ta’kidlab, Yevropa mamlakatni bu yo‘nalishda qo‘llab-quvvatlashga intilayotganini aytdi. Uning so‘zlariga ko‘ra, Yevropa Ittifoqi Yevropa va Markaziy Osiyo o‘rtasidagi yo‘lni tezlashtirish maqsadida Transkaspiy yo‘lagini rivojlantirish uchun o‘n milliard yevrogacha mablag‘ ajratmoqda. Shuningdek, u mamlakatning chekka hududlarida ham sifatli raqamli aloqani ta’minlash uchun O‘zbekistonni Yevropa sun’iy yo‘ldosh tarmog‘iga ulash rejalari mavjudligini ma’lum qildi, deb xabar bermoqda «gazeta.uz».

Ursula fon der Lyayen Yevropa Ittifoqi O‘zbekiston bilan strategik muhim sohalarda hamkorlikni kengaytirishga intilayotganini qo‘shimcha qildi. Aprel oyida tomonlar muhim minerallarni yetkazib berish zanjiri to‘g‘risidagi bitimni imzoladilar va Yevrokomissiya raisi Yevropa nafaqat xomashyo qazib olishdan, balki mamlakatga ish o‘rinlari va iqtisodiy foyda keltiradigan mahalliy ishlab chiqarishlarni yaratishdan ham manfaatdor ekanligini ta’kidladi.

Shuningdek, u O‘zbekiston va Yevropa Ittifoqi o‘rtasida investitsiyalar va savdo hajmini oshiradigan kengaytirilgan sheriklik va hamkorlik to‘g‘risidagi yangi bitim imzolanishini e’lon qildi. 2024 yilda Samarqandda «Markaziy Osiyo — Yevropa Ittifoqi» birinchi sammiti bo‘lib o‘tadi, bu munosabatlar rivojlanishida muhim qadam bo‘ladi.